گھر کے چراغ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔!
کوئی چارہ گر ہی نہیں یہاں ، مرے دل کا درد گھٹے کہاں ؟
’’ وہ جو بیچتے تھے دواء دل ، وہ دکان اپنی بڑھا گئے‘‘
دلِ ناتواں نہ ہو مضطرب ،ہے کٹھن جو زندگی کا سفر
ترے حوصلے تری مشکلیں سبھی سہل کر کے دکھا گئے
جنہیں آگے بڑھنے کا شوق تھا انہیں واپسی سے نہ تھی غَرَض
جو بھی ساحلوں پہ تھیں کشتیاں خودہی اپنے ہاتھوں جلا گئے
پڑا وقت مجھ پہ ذرا بُرا ، لگے رہنے مجھ سے کھنچے کھنچے
جو تھے کہتے محفلِ جاں مجھے ، وہی دوست نظریں چُرا گئے
یہ ہیں زندگی کی حقیقتیں ، یہ ہیں زندگی کی کہانیاں
جنہیں چاہا میں نے ہے بے غَرَض ، وہی لوگ دے کے دغا گئے
یہ خیالؔ کیسا خلوص ہے ، یہ ہیں کس طرح کی محبتیں ؟
مرے دوست میرے چَراغ سے مرے گھر کو آگ لگا گئے ۔۔۔۔!